Në  hyrje të komunës së Gostivarit është vendosur tuneli dezinfektues.  Ky tunel  dezinfekton  të gjithë ata  persona që  hyjnë  në këtë objekt dhe dezinfektimi bëhet automatikisht duke kaluar. Kryetari I komunës së Gostivarit, Arben Taravari thotë se qëllimi është simbolik që të kujdesemi për higjienën.

“Në çdo kalim të ndonjë personi që hynë në komunën e Gostivarit  dezinfektohet. Kapet sipërfaqja e trupit të  qytetarit që hynë në komunën e Gostivarit. Jemi duke përgatitur edhe një tunel për qendrën e komunës së Gostivarit”, tha Arben Taravari, Kryetar i Komunës së Gostivarit.

Ky dezinfektues është  prodhim i kompanisë “Universal” nga Gostivari që merret me prodhimin e pajisjeve hotelerike  dhe medicinale nga materiali Inoks.

Menaxheri i kwsaj kompanie  Erzen Nesimi  thotë se ideja erdhi pas shpalljes së gjendjes së jashtëzakonshme  dhe  kjo kompani mendoi që në këtë mënyrë  të jap kontribut. Nesimi tregon se si funksionin ky sistem që të jetë sa më efikas.

“Mënyra më e mirë që të përdoret ky  tunel është të hyhet me krahë hapur  të ecët më ngadalë ,  rreth 15 sekonda është intervali që duhet  të respektohet në mes të tunelit.  Mirë është të behët një rrotullim prej 360 shkallëve  dhe me këtë sistemi është më efikas”, tha Erzen Nesimi, Menaxher i Universal.

Interesim për  këtë prodhim tashmë kanë shfaqur  edhe kompani nga Turqia dhe Hungaria, si dhe një grup marketesh nga vendi.

“Kemi pasur shumë thirrje më shumë  nga bizneset private. Kemi interesim nga një zinxhir supermarkete që të montohet para tyre , na befasoi pasi kishte kërkesa edhe nga Turqia , po ashtu ka edhe një kërkesë nga Hungaria për  këtë sistem, ndërsa me institucionet jemi në bisedime”, tha Erzen Nesimi, Menaxher i Universal.

Tuneli higjenik  që është në funksion para komunës së Gostivarit është edhe versioni i parë i këtij prodhimi. Nga kompania “Universal” thonë se tashmë janë duke punuar edhe për versionin më  të përshtatshëm pasi dezinfektuesi është edhe mobil.