Presidenti rus Vladimir Putin autorizoi operacione ruse për të ndihmuar Donald Trumpin në zgjedhjet presidenciale të nëntorit të kaluar, sipas një vlerësimi të inteligjencës amerikane.
Sipas raportit, Kremlini dhe Irani u përpoqën për të ndryshuar rezultatin e zgjedhjeve, por në fund asnjë ndikim nga jashtë nuk ndryshoi votat ose prishi procesin e votimit, shkruan Euronews.
Raporti, i publikuar të martën nga Zyra e drejtorit të Inteligjencës Kombëtare, përfaqëson vlerësimin më të detajuar të një sërë kërcënimesh nga jashtë për zgjedhjet e vitit 2020.
Këto përfshinin përpjekjet nga Irani për të minuar besimin në votime dhe për të dëmtuar perspektivat e rizgjedhjes së Trumpit, si edhe operacionet e Moskës që mbështeteshin te aleatët e Trumpit për të ndryshuar rezultatin e zgjedhjeve”.
Raporti është pohimi i fundit zyrtar i integritetit të zgjedhjeve, ndërsa mbështetësit e Trumpit vazhdojnë të bëjnë pretendime të rreme për ndërhyrje, nga të huaj ose vendës dhe refuzojnë të pranojnë fitoren e Bidenit.
Gjykata të shumta dhe vetë Departamenti i Drejtësisë i Trumpit hodhën poshtë pretendimet e mashtrimit të përhapur. Raporti thotë se Rusia u përpoq të minonte kandidaturën e Bidenit, sepse e shihte Presidencën e tij në kundërshtim me interesat e Kremlinit, raporton Abcnews.al
Raporti gjithashtu thotë se Putini autorizoi operacione që synonin denigrimin e Bidenit, rritjen e fuqisë së Trumpit, minimin e besimit në zgjedhje dhe përkeqësimin e ndarjeve shoqërore në SHBA.
Sidoqoftë, Rusia nuk ishte aq agresive sa në ciklet e zgjedhjeve të kaluara në përpjekjen për të dëmtuar infrastrukturën zgjedhore.
Sipas raportit, operacionet kibernetike të vendit që synuan rrjetet shtetërore dhe të qeverisjes vendore vitin e kaluar ndoshta nuk ishin të përqendruara në zgjedhje, përkundrazi ishin pjesë e një përpjekjeje më të gjerë për të synuar njësitë e SHBA-së dhe ato globale.
Irani, ndërkohë, kreu fushatën e tij që synonte të dëmtonte rizgjedhjen e Trumpit, një përpjekje që zyrtarët e SHBA-së pretenduan se ishte aprovuar ndoshta nga udhëheqësi suprem Ajatollah Ali Khamenei.
Dokumenti me 15 faqe është një version i një raporti të ndërhyrjes në zgjedhje që iu dha Trumpit, më 7 janar, një ditë pas trazirave në Kapitol, që ndodhi ndërsa Kongresi po mblidhej për të certifikuar rezultatin e zgjedhjeve.
Një dokument i veçantë i publikuar të martën nga departamentet e Drejtësisë dhe Sigurisë Kombëtare arriti në një përfundim të ngjashëm në lidhje me integritetin e zgjedhjeve, duke thënë se nuk kishte prova se ka pasur ndërhyrje nga jashtë për të ndryshuar procesin e zgjedhjeve.
