Lista Guxo gjatë muajit të ardhshëm do të regjistrohet si subjekt politik në Komisionin Qendror të Zgjedhjeve.
Këtë e ka konfirmuar, deputeti i Kuvendit të Kosovës, Haxhi Avdyli.
Ky i fundit nuk e ka zbuluar datën e saktë, por ka thënë se gjatë muajit shkurt do të ndodhë një gjë e tillë.
Pas regjistrimit si subjekt, ai ka thënë se do të konstituohet kryesia, dhe zgjidhet kryetari i Listës Guxo.
“Gjatë muajit ardhshëm bëhet regjistrimi, dhe fillojnë përgatitjet tjera për konstituimin e të gjitha organeve. Do të mbahet konventa, kryetari i ri, kryesia, degët dhe do të jetë proces i vazhdueshëm gjatë vitit 2022”, ka thënë Avdyli për Indeksonline.
Sa i përket funksionimit në Kuvend, ai ka thënë se i kanë vetëm pesë deputetë dhe se nuk mund të funksionojnë si grup i veçantë parlamentar.
Lista Guxo aktualisht drejtohet nga kryediplomatja kosovare, Donika Gërvalla.
Kjo Listë ishte krijuar nga presidentja e vendit, Vjosa Osmani pas largimit nga Lidhja Demokratike e Kosovës.
