Lëvizja Vetëvendosje nuk ka pranuar ende ndonjë ftesë për takimin e thirrur nga kryeministri i vendit Avdullah Hoti për bashkërendim të qëndrimeve sa i përket dialogut me Serbinë.

Ndërkaq, pëmes një publikimi në Facebook, Manxhuka ka shkruar se ftesa për takim as nuk ka pasur nevojë të niset në LVV.

“Kjo qeveri është e paligjshme. S’ka as kredibilitet e as legjitimitet. E, ftesa e saj për takim as nuk ka ardhur e as nuk ka pasur nevojë ta nisin”, ka shkruar ai.

Kryeministri i vendit, Avdullah Hoti ka thirrur në takim nesër në ora 11:00 liderët partiak për bashkërendimin e qëndrimeve për procesin e dialogut Kosovë-Serbi.

“Me qëllim të bashkërendimit të qëndrimeve të spektrit politik të vendit, në procesin e dialogut me Serbinë, si dhe në vigjilje të vizitës në Ëashington, i ftova liderët partiakë për një takim të përbashkët të Forumit të liderëve, i cili do të mbahet nesër në orën 11:00 në Zyrën e Kryeministrit”, ka shkruar Hoti në Facebook.

Kurse, emisari special i BE-së për dialogun Kosovë-Serbi, Miroslav Lajçak në ditën e dytë të vizitës së tij në Kosovë, ka bërë të ditur se ka takuar kryetarin e Lëvizjes Vetëvendosje, Albin Kurti.

Lajçak pas takimit, në Twitter ka shkruar se ka theksuar nevojën për një zë unik të Kosovës në procesin e negociatave.