Ish-ministri i Punëve të Brendshme, Agim Veliu ka thënë se vendimi i sotëm i MPB-së për vendosjen e reciprocitetit ndaj Serbisë për targat e automjeteve, sipas tij, është vendim, të cilin e ka nënshkruar ai në cilësinë e ministrit të Punëve të Brendshme me 17.09.2020, për shfuqizimin e Udhëzimit Administrativ Nr.02/2018 për Regjistrimin e Automjeteve me Targa KS.

Përmes një postimi në Facebook, Veliu ka thënë se vendimi i sotëm vjen si rezultat i Marrëveshjes së nënshkruar në Bruksel më 14 shtator 2016 ndërmjet Kosovës dhe Serbisë lidhur me lëvizjen e lirë.

Veliu e ka quajtur lajm të mirë atë se Qeveria aktuale po i njeh marrëveshjet ndërkombëtare të nënshkruara në kohën e Qeverisë Hoti.