Rusia i del në krah Serbisë, akuzon kosovarët

Ministria e Punëve të Jashtme të Rusisë është deklaruar rreth zhvillimeve të fundit në veri të Kosovës. Natyrisht, duke përkrahur Serbinë.

MPJ-ja ruse ka suluar liderët kosovarë pas vendosjes së reciprocitetit ndaj Serbisë, e cila kurrë nuk ka njohur dokumentet e Kosovës. Sipas saj, Perëndimi po dëshiron “të neutralizoj më tepër me duart e shqiptarëve”.

Moska, që kryen agresion ndaj Ukrainës gati gjashtë muaj, thotë se serbët nuk qëndrojnë duarkryq.

“Udhëheqësit e shqiptarëve të Kosovës e dinë se serbët nuk do të qëndrojnë indiferentë kur bëhet fjalë për sulmin e drejtpërdrejt ndaj lirive të tyre dhe qëllimisht po e përshkallëzojnë situatën për të nxitur një skenar ushtarak. Sigurisht se Beogradi është shënjestër e sulmeve të ashpra, e që Perëndimi dëshiron t’i neutralizojë më tepër me duart e shqiptarëve”, thuhet në njoftimin e Ministrisë së Punëve të Jashtme të Rusisë.

Policia e Kosovës ka njoftuar se janë mbyllur pikëkalimet kufitare në Bërnjak dhe Jarinje, për shkak të bllokimit të rrugëve që të çojnë në këto dy pika.

Në veri ka nisur bllokimi i rrugëve me kamionë, një orë pasi u dëgjua alarmi i qytetit.

Qeveria e Republikës së Kosovës ka njoftuar se nga 1 gushti do të hyjë në fuqi vendimi për reciprocitet me Serbinë, për çështjen e njohjes së dokumenteve.

Prej të hënës, në Kosovë, shtetasit serbë që prezantojnë në kufi dokumente identifikuese të lëshuara nga Serbia, do të pajisen me një dokument “hyrje/dalje”. Ky dokument do të lëshohet në të gjitha pikatkalimet tokësore dhe ajrore dhe do të jetë i vlefshëm për 90 ditë, ashtu sikurse dokumenti që autoritetet serbe lëshojnë për shtetasit e Kosovës kur të hyjnë në Serbi.