Jasir Asani mesa duket do të ndryshojë ekip para se Euro 2024 të startojë. Sulmuesi me origjinë nga Shkupi me shumë mundësi do të transferohet në Gjermani.

Është vetë menaxheri i Asanit i cili ka shpërndarë një video ku ndodhet në stadiumin e Dusseldorf, së bashku me drejtuesit e klubit gjerman. Teksa, po në këtë video ka etiketuar Jasir Asanin, duke e shoqëruar edhe me figurën e një bombe.

Agjenti i Asanit, Aleksandar Jovkov shihet duke biseduar me drejtuesit e Dusseldorf, dhe mbi video vendos dhe një figurë tjetër që tregon që diçka është në proces.

Kjo video ka bërë që të besohet se shumë shpejt do të vijë firma e Asanit me ekipin që momentalisht militon në Bundesliga 2. Por do të luajë finalen përballë Bochum për të vendosur nëse do të promovohet në elitën e futbollit gjerman.

Kujtojmë që 29-vjeçari nga Shkupi është pjesë e ekipit të Gwangju që prej fillim vitit 2023, por kohët e fundit marrëdhëniet e tij me trajnerin e klubit korean nuk janë shumë të mira. Kjo gjë është edhe një shtysë për Asanin që të largohet dhe të kërkojë një aventurë të re.